قصة نجاح حيدر رسول من النجف #1

➤قصص نجاح #1

سلام عليكم ...
اسمي #حيدر رسول خليل من النجف الاشرف .
طالب طب عام مرحله اولى في جامعة جابر بن حيان الطبية في النجف الاشرف.

طبعا اول ما خلصت امتحانات الخامس مباشرةً بدايت اقره مواد السادس طبعا اني مقرر انه اقره المواد كلها على الموبايل ولا مفكر ادخل خصوصي ولا مدرسه اهليه فضليت اقره لمده اسبوع بعدين صار حجي انه اهلي يردون ادخل خصوصي واني ما اريد وبعدين مره عمي كالت كل كتاب ب 300 ورقه شلون تقراه شلون تخلصه.
 ثاني يوم رحت لبيت جدي لان جان عيد فكالو انت اذا رحت خصوصي شوكت تلحك تقره وشتقره ابو الخصوصي يريد منك واجب وابو المدرسه يريد منك واجب روح مدرسه اهليه فكرت بيه شفت حجيهم صح رحت كلت لأهلي اني ما اريد ادخل خصوصي اريد مدرسه اهليه (طبعا احنا بنجف المدارس الأهلية هواي واسعارهن من 1.5مليون لل مليونين) قبلو اهلي وصارت صدك ورحت مدرسه اهليه (وهذا الحجي كله اني ما مقتنع بيه انجبرت اقبل بيه لان اذا ما طلعت معدل راح يجون اهلي ويكولون ليش مارحت خصوصي ليش ما رحت اهلي).

 داومت يوم 26/6/2018 اول ما سجل شو اجو ناس كرايبي يكولي انت ليش رحت مدرسه اهليه روح خصوصي فد درسين والبقيه عود دبرهن عبالك ماخذ الفلوس من عدهم ومن داومت بالمدرسه الأهليه شفت انه تدرسيهم مو ذاك المستوى وكلما انكول للإدارة غيرو المدرس ميقبلون ف الطلاب اتفقوا انه يكتبون ورقه بيها اسامينه انه هذا المدرسه منريده و ودوها للإدارة وحاجو المدرس و الشغله كلها ذبوها براسي انه اني ما اريد المدرس كتلهم اني شعليه المدرس شد وياي كلما يشوفني يخزرني وحيل شد وياي حاولت انقل لغير شعبه ما قبلت الاداره و باقي المدرسي يكولولي حيدر حباب لتروح خليلنا واهس ندرس و اكو مدرس ثاني يكول اذا انقل بعد لا احجي وياك ولا تحجي وياي لان اذا اضل وياهم اجيبلهم نسبه عاليه.
 وقبل هاي الأحداث صارت عندي ظروف ومشاكل بالبيت وهو اني شي ما اريده انجبرت عليه (مع العلم اني ما عفت الدراسه ع الموبايل حتى من رحت مدرسة اهلية) فيوم من الايام قررت انه اعوف المدرسه الاهليه لان كلش فاشله واداره سيئة واني جنت بعدني ما امودي الوثيقة مالتي فكلت خلي اعوفهم احسن من ما اخسر فلوس بالخالي بلاش يوم 26 /9 /2018 تركت المدرسه الاهليه والمده الي داومتها هي 4 أشهر وانطيتهم مليون اول ما تركت المدرسه الأهلية الناس كامت تضحك عليه ويشمتون بيه ويكولون انت اغبر انت ما عندك عقل شلون اتعوفها وتطيهم مليون وانت احسب احسابك راح تعيد السنه اني ما احجي ساكت رحت للمدرسه الحكومي وصخه رحلات مكسره المدرسين اتكول امسوي عليك فضل من يدرسك ويكولك من البدايه اني ما اكمل المنهج اني ما اهتمت بالمدرسه اهتم بالدراسه ع بالموبايل وضليت اقره عليه وره اسبوع من داومت بالمدرسه الحكومي اتوفه جدي.
ضليت اقره لحد ما اجت امتحانات نص السنه امتحنت ونجحت وطلعت معدل 93 وضليت اقره لحد يوم 28 /3 /2019 كملت كل الكتب من اول ورقه لاخر ورقه
اجت فتره المراجعه وضليت اراجع المواد حسب جدول اني سويته وما جانت اقرايتي 14 ساعه لو اكثر جنت اقره 9-10 ساعات وجنت اركز ع نوعية القرايه اكثر من كميتها اجت الامتحانات امتحنا إسلاميه وجانت الأسئلة سهله وثاني امتحان اجت اسئله العربي جانت اسئله صعبه كلش وخاصةً الادب احتاريت بين ما أأجل وبين ما امتحن و امتحنت وكمت ابجي وانقهرت وراحت احلامي و نفسيتي تعبت واثر اهواي هذا التعب ع درجه الانكليزي المهم امتحنت بقيه الامتحانات والحمدلله جانت اسئله زينه واكو اسئله طويله ومزعجه الحمدلله كملت الامتحانات واني هذا هو انتهيت والناس راح تشمت بيه و تضحك عليه كله بسبب امتحان العربي يوم النتائج اني بارد كلش لان اعرف ما راح اطلع معدل لان العربي دمرني الحمدلله طلعت النتائج يوم 31/7/2019 وطلع معدلي 97.29 ودرجه الدور الأول صار 98.29 فرحت وطاير من الفرحه  فرحه كلش جبيره والحمد والشكر لله دائما وابدا وبفضل مجهودي واهلي وانقبل طب عام حلمي من الطفوله وهذوله الي يشمتون بيه هم اول الناس باركولي وهم من بداخلهم حقد ضايجين شلون قره ع الموبايل وطلع معدل عالي ودائما خلي بذهنك انه انت اطلع الاول ع العراق لتكول ما اكدر كول اني راح اطلع الاول ع العراق حتى اذا متحصل الاول ع العراق اتحصل الي اقل منه بشويه واحب اكول للكل رأيك هو الي يحدد مصيرك لتخلي واحد يكلك سوي هيج لو هيج انت القرار الي تاخذه ومتأكد منه صحيح وراح يفيدك وينفعك هو هذا القرار الصحيح والي راح تعتمد عليه ومو عبالك انت من طلعت معدل عالي الناس راح تفرحلك اكو هواي ناس راح اتحسسك انه فد شي عادي مو مهم طبعا وهم جواهم يكولون هذا شلون طلع معدل عالي شلون هيج!
تره اكو ناس متريدلك الشي الزين اتريده بس الها ولجهالها المهم هاي قصي واعتذر طولت عليكم وهاي درجاتي إسلامية 100 عربي 96 انكليزي 90 احياء 98 رياضيات 100 كيمياء 98 فيزياء 100ز








0/Post a Comment/Comments

أحدث أقدم