افتخر بنفسك #14

➤ قصص نجاح #14


قصتي وي السادس بدت ويه رحلة الخصوصي 

جنت ادرس اكثر من مادة بنفس اليوم بحيث مجنت أكدر اشوف اهلي من غرفتي للسيارة ومن السيارة للخصوصي و خلصته ع المنوال هذا جنت طالبة كُلش شاطرة حسب رأي الاساتذه وجانت اقل درجه ٩٧ بهاي الفترة صح جانت درجاتي تمام وماشيه تمام بس مجانت عندي ثقه بنفسي جنت اخاف هوايه بس استاذي بالكيمياء هواي ساعدني (جان يسميني لوز) شجعني هواي بحيث بديت اثق بنفسي وقدراتي شوي شوي بعد كم شهر وي الخصوصي اجه دوام المدرسه اللي دمرني حيل بسبب اختلاف طرق التدريس والأفكار اللي مشيت عليه بالعطله وانصدمت بدرجه الكيمياء ٨٠ هنا عقلي كام ميستوعب شي خفت هواي بسبب هالخوف قررت اركز ع المواد العلميه واهملت الأحياء والإسلامية والادب كمت ما احضر يومي بسبب الخصوصي وقتي كله تخربط اجتي نص السنه شديت حيلي وطلعت معدل ٩٦... وراه بعطلة نص السنه هم دخلت خصوصي أحياء مجنت افهم عليه ابدا وما أكدر اعوفه لان كل الاساتذه معدهم مجال بقيت يمه شوي شوي كمت افهم بس بعدني أواجه صعوبه بفصل الوراثه ركزت اكثر شي ع المسائل ونسيت الشرح بعده بفترة اجتي المراجعه اكبر خطأ سويته انو راجعت وعندي نقوصات كومه بس مع ذلك استمريت كلت اتعب أكثر والحك خلصت رياضيات وكيمياء ومن بديت بالفيزياء اتوفت اختي وصديقتي جانت كلشي بالنسبه اليه هنا تدمرت كليا جانت سند الي وتدعمني بهواي أمور اكثر شخص وكف وياي ظليت اسبوعين ما أكدر أقره يادوب ورقه اتحطمت حيل وره ها لأسبوعين رجعت أقره عفت الفيزياء ع النص ورحت للأحياء لانه ما بقالي وكت وهم عفت فصل من الأحياء بس كمت بالليل أقره وي المادة الاساسيه المواد اللي صار عندي نقص بيهم تقريبا كملت المواد بس ما ضابطه اموري بعدني خايفه وصلت الاسلاميه اللي مجنت اقراه باليومي وكدامي ٦ ايام بس قريت هواي بس عانيت منه وبليلة الامتحان قررت اعيد خفت حيل ما ادري ليش بس حسيت حلمي اتدمر رحت لوالدتي ما قبلت والدي خيرني يا اكمل يا ماكو دراسه بعد كلت اكمل اتوكلت ع رب العالمين وامتحنت اسلاميه جنت مجاوبه زين من رجعت للبيت شفت اجوبه مو نموذجيه تختلف تماما عن اجوبتي حسبته اخذ ٨٠ زين بهاي الحاله شلون مقريت عربي بسبب الخوف رحت امتحنت قدرت درجتي ٩٢ مناك اسلاميه ٨٠ شلون فمسحت العربي واجلته رجعت للبيت منكسره حيل مالي خلك شي خيبت امل اهلي بس بابا كعد ينصح بيه ومن شفت دموعه هنا قررت ارجع من جديد وفعلا امتحنت انكلش بكل سهول كذلك رياضيات وصلت للكيمياء جنت مخلصه كلشي وحاسبه درجتي ١٠٠ ومتأكدة بس جانت كدامي طالبه كلش شاطرة ظلت تسأل اسئلة غريبة انوب مسحت الدفتر وهي تبجي هنا قلقت راجعت لكيت عندي غلط بالحسابات طبعا جان بسيط كلش بس بسبب عدم الثقه مسحت الدفتر امتحنت أحياء وفيزياء وخلصت تعبت حيل جنت كل هالفترة ما انام ولا اكل شي قليل بس بدت مراجعه العربي والكيمياء متعبت حيل لانه قريتهم زين بيوم نتائج الدور الأول طلع معدلي ٩٦.٤ هذا المعدل حتلو امتحنت الكيمياء والعربي وأخذت ١٠٠ هم ما راح اطلع طب عام انكسرت كلت لاهلي اعيد بس نفس الشي هم ما قبل بابا وكال امتحني امتحنت طلعت النتائج ٩٧ فرحت وبجيت لانه احتمال صعب اطلع طب عام بس من شفت اهلي فرحانين وارتاحو فرحت
اسمي غدير.

هسه اني مرحله أولى أسنان كلش فخورة باللي حققته
نصيحه وحدة وثمينه لا تخافون الخوف يدمركم حرفيا كونو فخورين باللي راح يطلع يمكن اللي تردونه مو بصالحكم ورب العالمين ضاملكم فدشي احلى من اللي تتمنو صحيح مدخلت طب عام بس كلش فخورة وفرحانه باللي طلعلي.

0/Post a Comment/Comments

أحدث أقدم