قصة تفوق طالبة محبة للانكليزي #21

➤ قصص نجاح #21 


بسم الله ..


طبعا السادس احلى اصعب ايام بحياة الطالب

 يمكن البعض يستغرب ويگول وين الحلو بالموضوع بس متحس بهل الشي الا بعد ما تجتاز هالمرحله تدخل بصراع المواد حتى توصل لحلمك ..
اني دخلت السادس بدون ما أقره بالعطله الصيفيه مجرد اطلاع بسيط ع المواد وبس بده العام الدراسي واني متحمسه لأن هاذي السنه ح احدد مصيري أحد مستقبلي فكانت بدايتي موفقه وادرس بجديه صراحه..امتحنت الأشهر الاول الأمور تمام شويه شويه بده الواهس يقل عندي تجاه الدراسه 😥
وامتحنت شهر ثاني نجحت بس مو بالدرجات المقبوله حتى أأهل نفسي للوزاري اجت امتحانات نصف السنه اول يوم كان عدنه عربي الي هو أكثر ماده أواجه بي صعوبه وكأبه من ادرسه درست القواعد والأدب والنقد بس تركت بيهم مواضيع ما لحكت اكمل ثلاث كتب المهم رحت للمدرسه والخوف من الماده كان كولش مسيطر عليه بحيث فكرت انو ما امتحن لأن حتى لو امتحن ح ارسب بي بس صديقتي مقبلت وگالت تدخلين تمتحنين وشتجي من درجه ميخالف ..دخلت امتحنت والباقي ع الله وامتحنت بقيه المواد الأمور طيبه جنت انام ساعتين فقط من ١٢ بليل لـ ٢ واكعد اكمل وخلال فتره الامتحانات كولها اني بالي يم العربي جنت مأيسه من النجاح بي..
فأجت النتائج واني جنت متوقعه اطلع بدرس الي هو العربي بس من المدرسه گالت ناجحه گولتلها جذب 😅 والله لأن ممصدكه انجح بالعربي اجتني الدرجه ٥٢ 🙄.
واني من بدايه الامتحانات اعتبرت درجات نصف السنه مو قياس للوزاري لأن الدراسه ح تختلف والوقت ح يكون أكثر فابداً لا تساوون نصف السنه بالوزاري
نسيت اكلكم اني كان هدفي تربيه انسانيه قسم اللغه الانگليزيه ...
بدينه بالفصل الثاني كنت مطمنه من ناحية الدخول لأن نصف اول ونصف السنه ناجحه بيهم هناا واجهت مشكله خارج الدراسه بدت تأثر ع نفسيتي كولش گمت اكره شي اسمه دراسه وكتب لدرجه مواد الفصل الثاني يمكن ثلاث ارباع منهم  ما قريتهم خلال الدوام بدينه نمتحن شهر اول وثاني طلعت بـ ٣ دروس السبب الأول حالتي والسبب الثاني عطلت من وكت وامتحان ما امتحنته
عطلت يوم ٢٩/٣/٢٠١٩ . هناا كولش تأثرت لأن ح اترك صديقاتي كان وجودهم دور كبير بالنسبه الي بقيت يومين ارتاح بيهم بعد ما عطلت حضرت مكاني الدراسي الي جان اله دور كبير بنجاحي كل شخص لازم يرتب مكان بعيد عن الضوضاء والاهل حتى يكون مكان هادئ وملائم للدراسه
بديت ارجاع بجديه رغم حالتي النفسيه السيئه ..حسب الجدول الي سويته بنفسي وعرضته ع المدرسات وكالوا عليه ممتاز وأغلب الصف مشه ع جدولي لأن كان مرتب والاوقات حلوه والمواد ترتيبهم كان سهل ومفصله كل كتاب ع أيامه المحدده..لذلك انصح كل شخص هو يسوي جدول المراجعه بيده
جنت ادرس بالليل أكثر من النهار لأن متعوده ع السهر انام ب٢ واكعد بالسته ..دراستي مستمره خلال النهار بس بين الحين والآخر أخذ استراحه خمس دقائق وارجع ايام مراجعتي كانت ٩٢ يوم ولكن للاسف بالفتره الاخيره من المراجعه كمت اتكاسل بشكل مو طبيعي گمت اترك هوايه شغلات من الكتاب ما ادرسهم لأن كانت الفتره هوايه وگمت احس بالملل اخر وقررت أأجل العربي الي دوم اشوفه كارثه بالنسبه الي واستغل أيامه لبقيه المواد ..اخر خمس ايام من المراجعه درست بيهم ماده الاسلاميه حفظتها من الغلاف للغلاف مثل اسمي .رحت للامتحان والتوتر يقره 1000 طبعا قبل لا اطلع من البيت تركت الكتاب وبعد مفتحته ابد ولا اختلطت بالصديقات الي يسألون بالماده وتفاصيلها لأن ادري تلاص عليه إذا ابقه افكر واحجي بالماده فانطيت لعقلي استراحه تقريبا نصف ساعه عن موعد الامتحان وكان هالشي ممتاز ولازم كل طالب يسوي ..اجت الاسئله قريتها كولها گلت بداخلي اكيد أخذ بيها ١٠٠ لأن كل الاجوبه اعرفها ..بس كانت الأجواء بالقاعه ابدا متساعد بحيث الحر يموع المخ الي خلاني اخربط بسؤالين وراحت ال ١٠٠ عليه واجتني ٩٢
بعدها كان عدنه عربي اني كنت مفكره أأجله ع الدور الثاني فمارحت للامتحان بقيت ادرس للانگلش ..وبيومها هوايه طلاب أجلت الامتحان لان كانت الاسئله صعبه حسيت نفسي لاول مره اتخذ قرار صحيح 😅 لأن ما ضيعت يوم ..المهم كملنه الامتحانات بالف يا علي لدرجه بنهايه كل امتحان اگول شيطلعلي معدل اروح اي كليه وما اعيد السادس
كملت امتحانات استراحيت اسبوع وبديت أقره بالعله الي أجلته طبعا ماتندمت ابد لانو اجلته يمكن اسبوعين اني أقره بي وبدت الظروف تتراكم عليه وتهاونت وي الماده وحتى اعتقدت ما انجح بس نحجت بدرجه ٥٥ لا تستغربون هاذي درجاتي وي العربي ابد مو ع صلح اني وياه ..
طبعا النتائج طلعت قبل الدور الثاني وكان معدلي ٧٦ واني ادبي
قدمت تربيه انسانيه جامعه بابل ..بس كنت خايفه كولش خاف ما انقبل انگليزي لأن سمعت يعتمدون فقط ع المعدل ولازم يكون المعدل بـ ٨٠ اني هناا يأست الا شويه بس گلت اكتب بالاستماره اول شي تربيه انگليزي والله كريم وبالفعل الله اكرم عليه وانقبلت انگليزي جامعه بابل .

0/Post a Comment/Comments

أحدث أقدم