قصة قصيرة عن طالبة طب #22

➤ قصص نجاح #22 


اني طالبه من بغداد من منطقه الطارميه ومن مدرسه ثانويه المشاهده
طبعا اني جانت عندي رهبه من السادس من جنت بصف اول و ثاني متوسط باعتبار انو هو سنه مصيريه وانو مستقبلك حيتحدد من خلالها فقررت بالتوكل على الله انو اقره قسم من مواد السادس بالعطله مالت الرابع حتى تبقى عطله الخامس للدروس الخصوصيه وجبت كتب الادب و الاحياء وقريتهم واخذت عنهم فكره بالعطله مالت الرابع والحمدلله بعد منجحت من الخامس اخذت دروس خصوصيه بمواد : الانكليزي والكيمياء والفزياء والرياضيات واهم شي انو من ترجع من الدرس الخصوصي تراجع الماده الي نشرحت وتفهمها لان اذا مر عليها يوم واحد حتكلفك هوايه انو تتعب دتفهمها فأهم نقطه هي هذي
ومع الدروس الخصوصيه جنت اقره اسلاميه واحياء وادب همات مسويتلهم جدول
الاسلاميه كملتها قبل متبدي المدرسه اما الاحياء والادب بقى قسم منهم كملته بعطله نص السنه
وخلال فتره المدرسه اخذت درس خصوصي لماده العربي واهم شي بالمدرسه انو تحضر الواجب وتمشي ويه المدرس بالتحاضير ومتفوت ولا تحضير حتى لو كلفك هذي الشي انو تبقى سهران لثاني يوم الفجر
طبعا الظروف جانت شويه صعبه بحكم احنه منطقتنه صايره بأطراف بغداد فالدروس الخصوصيه بعيده عنه نأخذها بغير منطقه وجنه نتعب هوايه وخصوصا شهر رمضان كله جان بالدروس الخصوصيه نطلع الصبح ونرجع ساعه 1 او 2 الضهر والطرق والازدحامات ، بس هي هذي الحياة ماكو شي بيها سهل وماكو شي يجي بدون تضحيه والي يخلي كدامه حلم وطموح ما يهمه اي شي لان لازم يتعب ديحقق هذا الحلم ...
جنت مسويه جدول معين للقرايه وهم بفتره العطله مالت نص السنه ، و هم العطله الاسبوعيه الجمعه والسبت جنه نأخذ محاضرات لان جنه بعد ممكملين الماده
 وطبعا بالاعتماد على الله والحفظ و المتابعه تكدرون تسيطرون على المواد
وعطلنه يوم 20 بشهر 4 الاستاذ مالتنه سوانه جدول دنراجع بي المواد والحمدلله مشيت عليه وراجعت المواد ..
امتحنت قسم من المواد دور اول واجلت 3 مواد دور ثاني ، ومع العلم شكد سمعت كلام انو محتكدرين ادبريها وشلون اجلتي 3 مواد وحتنزلين معدلج بس ابد مسمعت لاي شخص لان اني الي حقره واني امتحن واني اعرف نفسي فما ضرني كلام اي شخص بالعكس لو جنت ممتحنتهم دور اول كلهم جان نزل معدلي
اجلت احياء وكيمياء وفيزياء وقريتهم بالعطله وكدرت بفضل الله انو اسيطر عليهم وامتحنتهم وجانت درجاتي بيهم اعلى من المواد الي امتحنتهم دور اول
مع العلم انو والله بعض المواد جنت مجاوبه بيهم فول وما اخذت استحقاقي بيهم بس الحمدلله على كل حال ..
ونصيحتي لكل طالب سادس مهما كان ظرفه انو يخلي حلم وطموح كدامه ويسعى ديحققه ويجاهد ويضحي بكلشي ويتعب لان هي سنه وحده توكف على هاي السنه مستقبلك وحياتك كلها وابد لتخلي الظروف عائق كدامك انسي كلمه ظرف او اني ما اكدر او هذا الشي مستحيل كلنه نكدر بس يحتاج عزيمه وتضحيه ومثابره واهم  نقطه انو متلتفت لكلام اي انسان انت تعرف نفسك زين وتعرف مقدرتك وحاول وثابر ولتضيع ثانيه من وقتك
واحلى شي بالاحلام هي الاحلام الي تتحقق بعد تعب طويل ويارب الموفقيه للجميع ...
الاسم / أنفال وليد احمد ... المعدل / 94.71
انقبلت بكليه الطب جامعه تكريت

0/Post a Comment/Comments

أحدث أقدم