دائما هناك فرص #25

➤قصص نجاح #25 


سلام عليكم اني طالبه حاليا مرحلة رابعة كلية طب اسنان جامعة بغداد


وهذا كان طموحي  من الطفوله  انو اكون طبيبة اسنان بالنسبة لمستوايه بالمدرسة كان كلش عالي ودائما متفوقة ومن الاوائل بكل المراحل ابتدائية ومتوسطة واعدادية وصلت لصف سادس قريت بصورة مو طبيعية فعلا مو طبيعيه يعني اكثر ساعات اليوم دراسة وعدت المادة اكثر من مرة بحيث وصلت الامتحانات واثقة من روحي انو راح اجيب المعدل الاريده وادخل كلية طب اسنان بس الصدمة انو معدلي طلع ٩١.٣٢ كلش انقهرت وانقهرت اكثر على التعب التعبته بالسادس وكانت هذي النتيجة! قررت ان اعيد السادس مره ثانية وحضرت نفسي على الاعادة بس لمن راجعت المدرسة كالولي انو ماكو اعاده وتحسين معدل بالنسبة لسنتنه  فقررو اهلي يدخلوني طب اسنان  كلية اهليه في سبيل احقق حلمي السعيتله سنوات طوال ..طلعن القبولات الحكومية وانقبلت هندسة حاسبات بالجامعة التكنولوجية منقهرت كلش لان جنت معتمدة على قبول الكليه الاهلية وفعلا طلعت القبولات ومنقبلت طب اسنان !هنا فعلا تحطم حلمي وادمرت تماما وقررت انو ماكمل دراسة خلاص خصوصا انو بدت الجامعات بالدوام ..بعد فتره بدت الجامعات الاهلية تقلل بمعدلات القبول واخيرا انقبلت باحدى الجامعات فرحت كلش انو اكو فرصة لتحقيق حلمي بس نفس الوقت كنت اتمنى انو اداوم بجامعة بغداد لان احسهه جامعة عريقة على كل شي احسن من شي فقررت انو اداوم بالكلية الاهلية بس كان اكو بداخلي شي مراضي بالوضع فمن اول يوم داومت بي عرفت بقرار نقل الاوائل من الكليات الاهلية للحكومية وبديت اشتغل على هذا الاساس ودرست بطريقة اكثر من دراستي بالسادس لان حسيت هذي فرصة اخيرة الي كانت سعياتي عاليات كلش وبالفاينل هم كنت واثقة من اجاباتي فتوقعت انو اطلع من الاوائل خلصت السنة فعلا بعد تعب وعناء ذاعو اسم الاولى فقط وكانت مو اني اوكي منقهرت لان كانت تستحق ضلت لي فرصة انو اطلع ثانية او ثالثة وانقل للحكومي بس الكلية مذاعت الاسماء تواصلت ويه الدكاتره كالو ماكو اسماء الاوائل بس الاولى تقريبا فقدت الامل واستسلمت للامر الواقع خلصت العطله وداومت صف ثاني عادي ونسيت امر النقل ومره من المرات كان يوم اثنين بمختبر الفسلجة والدكتور يشرح نغتني صديقتي( كالتلي البارحة البنيه الثالثة عل قسم ناشرة عل فيس صوره الاوائل واسمج الثاني )بهاي اللحظة كان شعور لا يوصف ورجعلي الامل انو اكو فرصة ثانية للنقل فعلا بده ابوية يمشي بالمعاملة وكان هدفي جامعة بغداد وبعد مرور شهر واني اقره مواد جامعتي ومواد جامعة بغدادوماعرف اني وين! رحنه لجامعة بغداد بس رفضو الطلب كالو اكو منافسة وانتو جايين متأخرين بس راح نبقي وراجعولنه بعد اسبوع ..عموما اكو فرصة اخرى للمستنصريه او اي جامعة حكومية اخرى بس قدر الله وماشاء فعل راجعنة بغداد بعد اسبوع وقبلوني ولله الحمد وكدرت احقق حلمي الي كنت اعتبره مستحيل✍️.


0/Post a Comment/Comments

أحدث أقدم