اشاعات خاطئة او كاذبة عن السادس #3

➤ نصائح #3

اشاعات خاطئه او كاذبه عن السادس 

 الاشاعة 1 : السادس صعب حيل مايتجرع ! 

الحقيقة: جذب مو صعب مثل ما يكولون الله وكيلكم حاله حال غير مرحلة الفرق  هو انه السادس مرحلة مصيرية ف الضغط النفسي يزيد وتحس انه صعب الا هو عادي مابي شي الي يدرس ما يصعب علي شي 

الأشاعة 2 : ما تطلع معدل لأنك ماداخل خصوصيا 

الحقيقة : كذب في كذب واحنا والدليل انه هواي طلاب من عوائل فقيرة طلعوا اوائل  على القطر كله والدليل اخر 3 سنوات من عوائل متعففه لا ملازم ولا خصوصي طلعوا أول على العراق 

 الاشاعة 3  : السادس لازم تقرأ 25 ساعة يله تجيب معدل ! 

الحقيقة : ماعليكم والله فقط حضر واجباتك وتحاضيرك اذا كملتهم اطلع وتونس ، وشي مهم الترفيه على النفس بالسادس لان يخفف الضغط اهم شي تدرس الامتحان اذا عندك والتحضير كمله وروح اسرح وامرح لان هي مو بكثرة | الدرس بل هي بطريقة الدرس الصحيحة .

 الاشاعة  4 : متطلع معدل من اول سنة لازم نعيد يله تطلع ! 

الحقيقة : هههههههاي ترا ماتضحك بس دالطلف جو المهم هذا حجي فارغ اذا تشد حيلك وتحضر يومي وتثق بنفسك اتهكر السادس هم من اول سنة . 

الاشاعة  5  : درجاتك بالشهري ونص السنة في مقياس الك ونفسها تجيب بالوزاري !

 الحقيقة : والله جذب بجذب اصلا الوزاري بهواي اسهل من الشهريات ونصف السنة و اني من الطلاب إلي جانوا بالزور ينجحون بالكيمياء بالشهري ونصف السنة بالنهاية جيت 96 بيها وكذلك العربي بنصف السنة درجتي جانت بال 60 بالنهاية جبت 94 لان بالوزاري حتكون فاهم المادة اكثر لان عندك عطلة قبله تقرأ بيها . 

الاشاعة 6 : الأسئلة تجي من خارج الكتاب وما تنحل ! 

 الحقيقة : ههههههههههه والله يجذبون عليك التزم بمنهجك وحل اسئلة وزارية و اترك كلشي خارج المنهج وسوالف الخارجي والاثرائيات لا تتقرب منها لأنها كلها مضيعة للوقت . 

الاشاعة 7: لا تدرس بالداوم لكن بالعطلة الوزارية شد حيلك تجيب معدل !

 الحقيقة : والله هذا الي يكلك هيج لويورطك لوهو جاهل غبي لان عطلة المراجعة الوزارية هي اسمها عطلة مراجعة يعني  فقط تكعد تراجع كتابك بيها موتوتك تجي تدرسه لأن اكو فرق بين تراجع وبين تدرس فإذا انت بالداوم كاضيها تسخيت وعربده وتونك بالمراجعة تكعد نقرأ فإني اكلك اذا نجحت زين .

اشاعة 8 : لازم تدخل مدرسة أهلية يله نجيب معدل ! 

الحقيقة : انه هذا الشي مو مقياس ابدا لان احنا شفنا الأول على العراق من قرية بسيطة جدا ومدرسة حكومية متواضعة لكن لانه معتمد على نفسه ومتابع لنفسه جاب معدل 86 . 99 الي هو الأول على القطر لان السادس 90٪ يعتمد عليك .

 الأشاعة 9 : فصل الوراثة بالأحياء صعب جدا !
 الحقيقة : هو اسهل واسخف فصل بمواد السادس كلها 

 الاشاعة 10: اسئلة الدور الثاني صعبة خصوصا الرياضيات والعربي

 الحقيقة : كلاوات كلها وتكدر تتاكد من كلامي باطلاعك على اسئلة الدور الأول والثاني لمواد السادس وشوف منو أصعب مرات الثاني اسهل ومرات الأول اسهل وبالنهاية تعتمد على دراسة الطالب فإذا جان دارس فلو يمتحن دور عاشر هماتين ميهمه هي غير الأسئلة من الكتاب نفسه لكل الأدوار .

 الاشاعة 11:ترا بالتصحيح يظلمون ويكسرونك فلا تتعب نفسك 

الحقيقة : حجي فارغ ادرس معليك بالعكس مرات يساعدون .

 الأشاعة 12: لازم تغلق النت ولازم تنام اكثر شي 4 ساعات ! 

الحقيقة : ههههههههه صدك جذب شلون يعني ماشوف ريال مدريد لومالعب كرة قدم لوما أتواصل مع الأصدقاء عمي  شدعوة ؟ هو اخلص امتحاني ودرسي وراها اتونس واطلع وارفه عن نفسي حتى مايصير عندي ملل بالعكس اغير جو فمعليكم بالحجي هذا الي بس يعقدنا من السادس ويكرهنا بي 

طلاب طبعا حجيتلكم وذكرتلكم اكثر الإشاعات المتداولة الكاذبة عن مرحلة السادس العلمي وحاولت الخصها الكم بهذا  الملف وطبعا كل كلامي عن تجارب شخصية وليس كلام عبث بل كلام واقعي للطلاب .
 اتمنى تاخذون فكرة صحيحة عن السادس وما تستصعبونه وطبعا كلشي صعب اذا ما ندرسه كلشي صعب اذا ما نتعب علي شوية ونكسر ظهره بعض الطلاب او الناس تخوفكم من مادة معينة ويكلك صعبة وماتطلع بيها معدل ولا تنجح بيها فهذا الشي موحقيقة بل هاي وجهه نظر فقط . فالي يدرس ويتعب ما يصعب علي شي و نتمنى بعد ما قريتوا هذا الملف تغيرت عدكم بعض المفاهيم المهمة و تمنالكم كل التوفيق بهاي المرحلة المهمة بالحياة الي راح تعلمك هوايه دروس من ضمنها انه لكلشي نهاية و انه حتى نكدر نكمل لازم تصبر ولازم تتوكل والا ما يجي يوم نحقق بي أهدافنا.

ودائما تذكروا هذه المقولة : العبرة بالخواتيم  »

-------------------------------
شاركونا بتعليقاتكم👇👇👇👇

0/Post a Comment/Comments

أحدث أقدم