دليل دراسة مادة الاحياء #4

➤ دليل دراسة مادة الاحياء #4





رابعا : دليل دراسة مادة الاحياء

طبعا مادة الأحياء اكبر مادة بالسادس الاحيائي ومادة تحتاج هواي وقت حتى واحد يكدر يضبطها ويضمن الدرجة الكاملة بيها. تحتاج تكرار منك تحتاج فهم منك وخسارة انه واحد ياخذ بيها اقل من 95 درجة بيها ❤️ لان مادة تعتمد عليك 100٪ وأهم شي تعرف تختار ملزمتك . هاي نظرة عامة عن المادة.

نجي شلون ادرس المادة واضمن بيها الدرجة الكاملة؟


اولا: - طبعا مادة تعتمد عليك انت وحدك تكدر تقرأهاكلها بدون استاذ حتى فصل الوراثة تكدر تقراه وحدك. طبعا اول ما تجي تقرا الموضوع لازم تدرسه او تقراه قراءه سطحية ثم تحاول تفهم الموضوع لان حفظ بدون فهم راح تنساه مع الوقت ف لازم تقرا وتتصور وتتخيل اليكاعد تقراه حتى تفهمه ويسهل عليك الحفظ. دائما حاول من الرسم تفهم الموضوع لان الرسم هو ملخص للشرح ف انت افهم الرسم وراسا راح تفهم الشرح ان شاء الله. لكن بعض المواضيع مابيها رسم فلازم من تقرا وتحاول تفهم حتى تحفظ اسرع دائما اقراها ورقة وقلم
تمام؟

ثانيا: - لازم وضروري ومهم جدا انك تاخذ ملزمة اسئلة وزارية وتاشرها عكتابك او على ملزمتك لان نسبة تكرار الأسئلة الوزارية كلش جبيرة وجاء من الوزاريات المتكررة بالدور الأول لعام 2018 تقريبا 142 درجة وعام 2019 جا 120 درجة نصا من الوزاريات المتكررة فلازم تضبطها من البداية وتاشرها على كتابك.

حول الأسئلة الوزارية لمادة الأحياء:
طبعا تختلف الدرجة من فصل إلى فصل
بالاحياء:
❖الفصل الأول : الخلية 20 درجة
 ❖الفصل الثاني : النسيج 20 درجة
❖الفصل الثالث : التكاثر 50 درجة
❖الفصل الرابع : التكوين الجنيني 15 درجة
 ❖الفصل الخامس : الوراثة 25_30 درجة.

يجي 6 اسئلة وترك سؤال ، طبعا مجموع
الدرجات لمادة الأحياء 140 درجة ف تترك 40 درجة وتجاوب على 100 دوما يجي سؤال وراثة من 12 درجة ثابت. غالبا يكون سؤال وزاري مكرر طبعا الرسومات مهمة جدا بالوزاري اقل شي يجي عليها 10 درجات ومرات 15 درجة. ف لا تستهين بيهم ابد واقراهم اول باول وأنصحك حتى تضبطهم تتابع الاستاذ محمد العنزي على اليوتيوب شارح الرسومات ب احسن صورة ❤️.

ملاحظات اضافية عن المادة:

مادة تحتاج تركيز اكثر من أنه تحتاج جهد وتحتاج منك تكرار بالقراءة حتى تترسخ بعقلك ▪️ اسئلة الفصل مهمة جدا تضمن منها 60 درجة ف ركزوا عليها ▪️ الوزاريات اذا ضبطتها نضمن اقل شي 110 درجات بالمادة هاي ثابتة دائما.
ودير بالكم تغيرون الملزمة. يعني لازم لمن تختار ملزمة ضروري تثبت عليها لان بس تغيرها راح تتخربط معلوماتك وتندم. ف حتى تحافظ على معلوماتك لازم تبقى على ملزمة معينة.

لماذا الثبات على ملزمة مهم جدا؟

لإنه انت لمن تتعود على ملزمة ف راح تحفظ شكلها بدماغك وراح تحفظ مكان الأسئلة ومكان الأجوبة فلمن يجي سؤال راسا راح تتذكر شكل الملزمه وراح تتذكر السؤال والجواب من خلال اتذكرك مكانهم. أما إذا غيرتها ف يطيح حظك يا ولدي
اتبع كلامي  حرف حرف حتى تحصل 100 درجة بالأحياء.

_________________________

شاركونا في التعليقات 👇👇👇

0/Post a Comment/Comments

أحدث أقدم