نصائح للمعيدين #5

➤ نصائح #5



المعيدين :

راح احجي هسه عن بعض الاسباب اللي تخلي الطالب يعيد :

اولا:اول ما يدخل السادس مخلي بباله الاعادة وهالشي رب الغلط 

ثانيا: بسبب ظروف صارت مع الطالب بفترة المراجعة او الامتحانات.

ثالثا: عدم التوجية الصحيح للطالب خلال العام الدراسي.

رابعا: اهمال الطالب للتحضير اليومي ف تراكمت علي وما بعد يلحك.

خامسا: الخوف والرهبة من الامتحانات.

سادسا:الاهل ورغبتهم

هاي بعض الاسباب الرئيسية اللي تجبر الطالب انه يعيد بعضها بسبب الطالب والاخر رغبة الاهل 💔وخارج ارادته.

هسه راح اتكلم عن الاعادة من كل الجوانب:

راح بالبداية اتكلم عن الحجي السلبي والافكار السلبية : 

خطية فئة من المعيدين يتعرضون لحجي سلبي كلش حاد وكانهم مرتكبين جريمة قتل لو سرقة وغيرها فقط لانه هو ديكافح ومصمم على فد هدف او يريد يرضي اهله او يريد يحقق فد طموح بباله هي هاي جريمته...اغلبية الناس تعاتبه ليش تعيد واذا عدت ما تستفاد ولا ترفع من معدلك اصلا راح تنزله والى اخره من هذا الحجي اللي ما يقدم او ياخر شي فحبيت اتكلم بهذا الملف عن بعض جوانب تخص المعيدين 

اولا: كلام الاهل والاقارب والاصدقاء :

راح بعض منهم يسمعك كلام جارح وكلام مسموم ويحاول ينتقص منك عمدا او بدون قصد فلا تهتمله ابدا وحاول لا تعبره اصلا لان الطلاب اللي عادوا قبلكم هماتين تعرضوا لنفس الموضوع فحاول تتجنبهم قدر الامكان ولا تهتم ابد لان فقط كلام فارغ.

ثانيا:التردد والخوف من الاعاده :

هالشي طبيعي لان القرار مو سهل لكن مع مرور الوقت والايام راح تتقبلة ويصير كلش عادي خصوصا لمن يبلش الدوام واكو ايجابيه كلش مهمه بالاعاده انه حتحس نفسك مسيطر عالماده لانك دارسها وماره عليك سابقا فتحس براحه وثقه بالنفس اكثر بالاضافة الى شغلة انك دخلت للامتحان الوزاري سابقا فراح تحس انه رهبه الامتحان شويه قلت وانك صار عندك خبره بالسادس كونك فتجربه وشايف الاسئلة الوزاريه 
تقريبا هاي اكثر شغلتين يعاني منها الطالب المعيد 👆.
لكن عندي كلام احب احجي للطالب اللي حيعيد وعنده نوع من الرهبة والتردد
احب اكولك انه فقط هو تاجيل للنجاح انه بدال ما تدخل الجامعة بهاي السنة ان شاء الله حتدخلها السنة الجاية وان شاء الله بالكلية اللي تريدها لان  وعندي ايمان بمقولة كل تاخيره بيها خير (اي شخص يحاول ياذيك بكلامه او عنده تردد فقط تذكر انه هاي قصة نجاح تاجلت لعام اخر لتكون افضل واجمل ان شاء الله 💖فخليك قوي ومؤمن بربك وقداتك تمام حبيبي؟
فهلشي يستاهل تتحمل كلامهم السلبي.
هلشي يستاهل تضحي بسنة علموده .
هلشي يستاهل انه تصبر حتى تناله.
بالنهايه (ان مع العسر يسراً)الايجي يوم وينتهي التعب . وابشرك انه اعرف هواي طلاب لمن عادوا كدروا يرفعون معدلاتهم هواية لانهم بالاعادة عرفوا اخطائهم وما كرروها وشدة حيلكم وان شاء الله انت على خطاهم .


الان انتقل لمرحلة نصيحتي الدراسية للمعيدين:

اولا: اياك ثم اياك تكرر الاخطاء اللي خلتك تضيع اول سنة بالسادس اوحتى اذا كانت ثاني سنة لازم تشوف الخلل وين وعالجه ولا ترجع تخطا بي هاي السنة ايضا .فتضيع مرة الخ وما راح تستفاد شي.

ثانيا: انصحك انه حاليا لاتدرس لحد ما يبلش الدوام لانك طالب معيد ومو جديده عليك المواد وايضا يجوز بعدك تعبانه نفسيتك فنصيحتي لا تقرا حاليا وانتظر الدوام .لكن اذا كنت مصر انك تدرس فلازم تقرا المواضيع اللي انت مدارسهم اول سنة او اللي ممضبطهم حتى تكمل كل النقوصات وتكون اكثر سيطرة.

ثالثا: دير بالك تحبس نفسك وتصير بعقلية اني معيد ولازم بس اقراء وما انام وما ادري ايش ترا هذا مفهوم غلط لان علميا انه لازم مع الدرس يكون ترفيه وتغيير جو حتى الحاله النفسيه تستقر ويكون درسك افضل .

رابعا: ملازمك ومصادرك لا تبدلهم ابدا .فقط الملزمه اللي تحس بيها اخطاء او نقص بدلها لان الثبات على المصدر مهم جدا جدا جدا حتى معلوماتك ما تطير. 

خامسا: اسمع كل نصيحه انزلها بلقناة من هسا لما تخلص من شي اسمه سادس ..اشاعات او معتقدات خاطئه حول المعيدين او الاعادة راح اجاوب اني عليها باسلوبي الخاص : 

اشاعه 1(هو هذا مستواك ما تجيب اعلى لو تعيد الف سنة)!

منو انت تقيمني ؟ لو انت تعلم الغيب وما ادري ؟ زين اللي عادوا ورفعوا معدلاتهم مو هم جانو معيدين لو براسهم ريشه عني ؟ لو اللي عاد وجاب معدل احسن مني؟ 
بس اذا ابوك جان صاحب هذه الاشاعة دير بالك دكله انت منو حتى تقيمتي ترا وداعتك يقيمك براجدي صاروخي 😂.

اشاعه 2(اذا عدت ما يضلك وهس تقرا )

صح بعض الطلاب يصير عدهم نوع من الملل والكسل وهالشي يعتمد على نفسيته اذا لكن 
لازم اي طالب معيد يعرف انه اذا عاد لفد هدف ولفد غاية لذلك لازم يدرس بجدية واني متاكد اي طالب عاد لفد غاية متاكد حيكون مستواه اقوى بهوايه من اول سنة او ثاني سنة  تنويه بطلو سالفه اريد جدول اقرا بي وطاير وراء العالم سويلي جدول وسويلي جدول ترا هلشي المفروض انت تسوي جدول وخطة تمشي عليها.

 لا تظل تعتمد على غيرك واعتمد على نفسك ....كطيعه😒اما الطالب اللي حيعيد ثالثا او ربما رابعة احييكم على هذه الروح والتحدي والعزيمة والصبر لان قليل جدا ناس مثلكم واتمنالكم كل التوفيق لان اكو طلاب قبلكم هماتين عادوا ثالثة ورابعة والله وفقهم وحقق حلمهم وان شاء الله انتو على خطاهم.

---------------------------------
شاركونا بالتعليقات👇👇👇

0/Post a Comment/Comments

أحدث أقدم