دليل دراسة ماده الفيزياء #7

➤ دليل دراسة ماده الفيزياء #7





طبعا الفيزياء هي من المواد الي هواي طلاب مستصعبينها على عكس حقيقتها الفيزياء مال سادس العلمي كلش اسهل من فيزياء الخامس العلمي سواء الاحيائي او التطبيقي ف هم من الخامس مستصعبيها وما يعرفون انه بالسادس كلش اسهل تمام ؟
طبعا المعروف انه الفيزياء تنقسم الى كلاميات ومسائل توزيع الدرجة لمادة الفيزياء يكون بالتساوي بالوزاري
 المسائل =70 درجة الكلاميات =70  درجة الحاصل 140 درجة تجارب ع100درجة وتترك 40 درجة .وعندك ترك سؤال وترك ضمني

نجي شلون ندرس هاي المادة ونسيطر عليها

الجزء الاول : المسائل :- 

حتى تفهم وتضبطهم لازم تتبع هاي الخطة
اولا: تسويلك دفتر خاص بالمسائل وتحل بي كل مسائل الكتاب بهذا الدفتر وبيدك ....اياك تعتمد على ملزمه لان ماكو ملزمه تكدر تفهمك مثل ما دفترك يفهمك وبالتالي تضبط المسائل وتضمن 50 درجة بالامتحان
ثانياً:- لمن تجي تحل المسائل بالدفتر لازم  تكتب كل لملاحظة(يعني الملاحظات الي خلتك تفهم المساله حتى لمن تجي تراجع راساً تتذكر وتفهم وبالامتحان تجاوب ❤️لان العلم الذي لا يدون يضيع خوش؟
ثالثا :- حاول بهذا الدفتر كلما تبدون بفصل انه تكتب كل قوانين الفصل قبل لا تبدي دون مسائل الفصل .....حتى من تجي تدرسة اولا تقرا القوانين ثم تجي للامثلة والاسئلة وكلش تفهم هيج

الجزء الثاني الكلاميات :-

 حتى تضبط الكلاميات وما تعاني منهم لازم نطبق الكلام
اولا: اذا انت تعتمد علة ملزمة فلازم اول شي تحدد ملزمتك ثم تثبت عليها على مدار السادس وما تغيرها ابدا ابدا ابدا خوش؟ بس تضل تبدل كلشي ما راح تحفظ
ثانياً: تقرا ورقة وقلم اياك تقرا بس شفهي ترا تنساها وما تضبط ف اعتمد على الورقة والقلم حتى تثبت بعقلك المعلومة بشكل اقوى من غير طريقة

ثالثاً: لازم تضبط كل الاسئلة الوزارية الي تخص مادة الفيزياء للكلاميات لان نسبة تكرارهم كلش عالية واجت نسبة تكرارها لعام 2019 بنسبه 100% اي درجة كامله
تاخذلك ملف اسئلة وزارية من القناة وتاشر الاسئلة الوزارية ع ملزمتك او كتابك وتضبطهم

الان ملاحظات عامة عن المادة 

*لازم تضبط اسئلة نهاية كل فصل حتى تضمن 70-80 درجة منهم بالوزاري والدليل انه اجت 90 درجة من اسئلة الفصل لعام 2019 دور اول نصا .

*لازم تضبط الوحدات مال كل قانون لان عليهم هواي درجات باوزاري .

*الاسئلة 95% نصا من الكتاب بدون تغير سوا بالارقام وهذا ما يعتبر خارجي دائما السؤال الخارجي يجي من اول فصل ويكون كلشش سهل 🖤.

*الكتاب بي مجموعه من النشاطات ودائما يجي منهم بالوزاري وعلي 10 درجات ما تتغيرر.

طبيعة الاسئلة الوزارية للمادة :
*دائما تجي 6 اسئلة وترك سؤال ويكون مجموع الدرجات للمادة 140 درجة تجاوب على 100 وتترك 40 درجة .

* دائما بكل سؤال اكو فرعين واحد منهم مسأله حسابية والثاني كلاميات .

*اول ثلاثة افصل يجي منهم 60-65 درجة وكلش مهمات.

* دائما يجي نشاط واغلبهم بيهم مخططات فاذا شرحت كامل وما كتبت المخطط والرسم تتنقص درجتين .

*وحدات السؤال مهمة كلش اذا ما كتبتهم تتنقص درجة.

*في حال جاوبت السؤال الرياضي كليته بس عندك اغلاط بالارقام لكن قانونك صح وخطوات صح تتنقص درجة .

هسه نجي نتعرف على افصل المادة وتوزيع الدرجات على كل فصل :
#الاحيائي 
الفصل الاول =20 د
الفصل الثاني = 20د
الفصل الثالث =25د
الفصل الرابع = 10_15د
الفصل الخامس = 15د
الفصل السادس =15 د
الفصل السابع =15 د
الفصل الثامن 10_15د
المجموع الكلي :150 د

#التطبيقي 
الفصل الاول =20د
الفصل الثاني =20د
الفصل الثالث 25د
الفصل الرابع =10د
الفصل الخامس=10_15د
الفصل السادس=20د
الفصل السابع =20د
الفصل الثامن = 10د
الفصل التاسع =5_10د
الفصل العاشر = 10د
المجموع الكلي :150 د

نصيحة عامة: خلي شي ببالك ماكو شي بهاي الحياة ما ينتهي سواء مرحلة دراسية او مادة , هو الحياة تنتهي نوب السادس ودائما كول اللة يسهل وتوكل ما حتحس الا خلص كل شي ❤️💔😁.

من افضل اساتذه اليوتيوب
1.حسن عبد الكاظم
2.نور الدين
3.عصام الشمري

المهم والملخص من كلامي بهذا الدليل :-

ليش كتلك سوي دفتر خاص بالمسائل
حتى من تجي بالامتحان الشهري او نصف السنة او بالامتحان النهائي الوزاري (تجي تقرا الملزمه مالتك ) دفترك الي انت سويتة اعتبره ملزمتك الي انت سويتها ومستحيل واحد يسوي ملزمة بيده ما يعرف كل اسرارها ومفاتيحها وبهاي الحالة تعتبر انت استاذ المادة مو طالب ومستحيل حيصعب عليك شي بعدها .

ليش كتلك اقرا وزاريات؟

حتى تتعود ع نمط الوزاريات وتتعلم وتتقوا كلش وتعتبر انت ضابط الكتاب وتجيب اعلى الدرجات بالماده واهم شي تحبها للمادة لان دائما لمن ناخذ عن شي انه صعب ف راح يكون صعب حتلو هو سهل اما اذا تاخذه برحابة صدر ف حتلو صعب فهو حيكون سهل عليك .....الامور تكون حسب ما انت تشوفها سهله او صعبه
واتمنالكم كل التوفيق💙.
--------------------------------------

شاركونا بتعليقاتكم👇👇👇

0/Post a Comment/Comments

أحدث أقدم