قصة نجاح بعد معاناة #9

➤ قصص نجاح #9


اول مدخلت سادس بديت بهمة وانه جان ببالي طب عام لان والدي الله يرحمه جان يريد اطلع طبية سجلت خصوصي ويديت اقرة ورة كل محظرة وبهمة كلش عالية بهل اثناء جانت تصير مشاكل جنت اتلافاها واكول بس اطلع معدل حكوف بوجه كل واحد كلي متطلعين معدل .

بعدين بدت المدارس اخوي تمرض ودخل مستشفى حيل تأثرت بس كملت دراسة جنت كلما انقهر او يصير شي اكعد اقرة اكول انه من اطلع معدل انسى كل اللي صار ببداية شهر ثاني اخوية سوة عملية وبنفس اليوم زوج خالتي سوة حادث وتوفى جانت صدمة كلش جبيرة وقلت دراستي وببداية شهر الثالث بابا سوة عملية واكتشفنة انه عنده سرطان .

هنا اني تدمرت ومن صدك عفت كلشي بعدين بابا وماما واخوية سافروا بشهر ٤علمود علاج بابا وجانت هل فترة بداية مراجعتي طبعا عافونة اني واخوتي وحيدنة وكل الشغل علية يعني حاولت اوازن بين الشغل والدراسة وبرمضان صادفت هل احداث وجنت كلما اقرة اذكر بابا واكول من اطلع معدل حيفرح بعدين كملت المراجعة ع خير ولشنة امتحانات امتحنت اول امتحان فول جواب .

اجة ثاني امتحان وصادفت رجعت اهلي من السفر بحيث مقريت ع اللي اذكره امتحنت وجاوبت الحمد الله صح جانت اسئلة صعبة بس جان والدي ميقبل ااجل وعلموده جنت ما ااجل وكملت الامتحان الثالث والرابع فول جوابي اجة الامتحان الخامس الكيميا بيومها تمرضت وكلشي مقريت وهم رحت امتحنت ع القاريته لان شديت حيلي كلش بالمراجعة وحمد الله جاوبت .

وكملت الامتحانات ع خير وراها والدي بدت حالته تسوء من سئ الى اسوء وطلعت النتائج معدلي ٩٤.٨٦ مصدكت من الفرحة كمت ابجي وركض ع بابا وحضنته وكتله وجان يكلي رفعتي راسي بحيث هل كلمة لسة بأذني اجة التقديم وقدمت طلع قبولي هندسة ليزر جامعة التكنولوجية ورة ما طلع القبول ب٣ ايام والدي توفى اني انهاريت .

طبعا مرت الايام واهلي كالولي الة تداومين وتقدمين انوب وموازي واهلي قدمت كلشي مطلعلي بالموازي ولا الاهلي اخر شي انفتح التقديم ع المنحة الكجانية مال الاهلي قدمت عليه واني اصلا مجنت اريد اداوم بس اهلي اصروا انه اقدم قدمت وطلعتي صيدلة منحة مجانية من شفتها ظليت ابجي وتذكرت بابا انه راد اطلع طبية والحمد لله هسة اني صيدلة بس منحة .

الخلاصة اللي اريد اكولها لو مهما تمر ظروف ع الانسان لازم يضل شاد حيله وايمانه برب العالمين يكون قوي ورب العالمين ابد ميضيع تعب احد ورب العالمين اذا ياخذ شي فينطي بدالة شي

اسفة ع الاطالة.
-----------------------------

0/Post a Comment/Comments

أحدث أقدم