انت كدها 99 #18

➤ قصص نجاح #18 

سلام عليكم

اني الطالبة ضحى   

      العام الماضي جنت بالسادس اعدادي اول مابديت هو جانت الدروس الخصوصية بالعطلة الصيفية بهاي المرحلة اني كلش ضبطت المادة الي جنت ادرسها باستثناء الاحياء و الاسلامية  كلت اعتمد بيهن ع المدرسة ف مادرستهن بالعطلة .
وراها جتي فترة الدوام و صعوبته  و الاسئلة الصعبة بالامتحانات الشهرية بس اني بصورة عامة ما جنت كلش متواصلة ويا شرح المدرسات لان جانوا يخربطون الي اني فاهمته بالمدرسة ف مرت هاي الفترة و الي اني اعتبرها اصعب فترة جانت لان مدرسة و امتحانات شهرية اضافةً الى الخصوصي الي جان مستمر بس عدّت هاي الفترة ع خير و جتي بعدها فترة المراجعة الي هي الفترة الاهم و الطالب من خلالها يكدر  انو هو يحدد مستقبله جانت فترة طويلة حوالي ٩٠ يوم ماجانت سهلة ابد بس جان الحلم و الطموح اكبر من كل شي بذاك الوقت و اني بتلك الفترة جنت اقرا بالسطح لان  اخويا جان طب اسنان و دراسته صعبة ف جنت مخلية الغرفة اله و خلال هاي الفترة طبعاً مثل كل الطلاب نفسيتي اتأذت كلش و جنت انهار مرات وابجي بس مع ذلك جنت اقرا و وراها جتي فترة الامتحانات الي هي اهم شي خلال هاي السنة ف بدينا امتحانات جان الامتحان الاول جدا سهل بس امتحان العربي جان جدا صعب و ٣/٤ القاعة اجلوه بس اني ماهزني هذا الموقف كلت ما اأجل لو شنو ميصير ف ما اجلت و من رجعت للبيت اكتشفت انو عندي هواي اخطاء ف كلش انقهرت حته بوقتها تمرضت و رحت للطبيب اتخيلوا يعني اني باجر عندي امتحان انكليزي وزاري بس صار عندي الم فضيع ببطني و انجبرت اروح طبيب بس مع ذلك خليت املي بالله اعظم من كل شي جنت كلش متأكدة بأن الله يكدر يغير كل شي و اكدر اجيب درجة زينة و بعدها كملت بقية الامتحانات جانت الاسئلة مو كلش صعبة  و جنت دائماً اردد دعاء( اللهم اني اسألك الثبات ) دائماً اقروا هذا الدعاءقبل الامتحان و كذلك سورة الانشراح و سورة الضحى و خلوا املكم بالله اعظم من كلشي سلموا امركم لله و اقروا و لتفكرون هواي بالنتيجة لان الي يسوي الي عليه الله ميضيع تعبه
المهم وراها جاي نتيجتي 99.14 بدون اضافات متتخيلون الفرحة الي تستاهل كل التعب الي تعبته لان التعب راح تنساه و تبقى بس الذكريات الجميلة للسادس  و حاليا اني طالبة بكلية الطب .
و ان شاء الله كل طالب يدرس و يتعب الله ميضيع تعبه و يحققله مراده 🌸🌸🌸🌸.


0/Post a Comment/Comments

أحدث أقدم