السادس الاعدادي #7

#الاشاعات_العشرة_الشائعة_عن_السادس



قبل لا اتطرق على الاشاعات المغلوطة عن السادس احب اگوللكم اي موضوع بالكون اذا استصعبتوا بفكرك راح يكون صعب عليك ومعقد حتلو جان سهل واذا استسهلت الموضوع بعقلك فمهما كان صعب حيكون سهل نعم يا سادة هذه هي قاعدة العقل الباطن ، شلون ما تفكر بالأمر راح يكون مثل تفكيرك الأمر اوكي ؟ 

فإني أحب اسردلك الحقائق الي أصبحت إشاعات آخر السنوات .


أولا : السادس صعب والمواد صعبة واذا تريد تجيب معدل لازم تعيد السنة وبس تقرا !!!
طبعاً هاي الإشاعة الي دمرت ٩٠٪ من الطلاب بحيث الطالب قبل لا يصل سادس يسمع هيج كلام فراسا يخلي ببالو أنه هاي هي اول سنة مافكر اطلع على ثاني سنة وتلگاه مستصعب المواد ومسلمها تراب أنه هاي السنة ضايعة ضايعة ، فتضيع عليه سنة بسبب الفكرة الغلط .
أما شغلة المواد صعبة ! ماكو شي صعب بالحياة الا إذا انت استصعبتوا وكبرت حجمو الي يدرس ما يصعب علي شي نهائياً اهم شي تكون مستعد نفسياً وتبرمج عقلك الباطن أنه المادة اذا اقراها تصير سهلة واذا اهملها تصير صعبة عود نشوف المواد سهلة لو صعبة ! واعرف هي عبور من الرابع للسادس ومن اول سنة جابت ٩٩ لأنه فعلاً تملك العزيمة وواثقة انه اذا اشد حيلي اسيطر سواء اني اول سنة او عبور !! فكر صح .

ثانياً : ما تطلع معدل الا إذا تدخل خصوصي وأهليات يله تجيب !!!
چا الي جاب اول على العراق سنة ٢٠١٩ مو طالب بقرية بسيطة ومدرسة بسيطة وفقير جدا جاب الاول على العراق ؟ فلاتصدكون هيج كلام ، وأغلبية الأوائل تلگاهم فقراء لأنه ماعدهم غير اعتمادهم على نفسهم وحاليا اي شي تحتاجو تلگاه على النت بكل سهولة فشيلو هاي الفكرة من بالكم .

ثالثاً : لازم تحرم نفسك من كلشي وفقط تكرس روحك للدرس !!
چذب والله الكلية اصعب بهواية من السادس ونتونس وسفرات وطلعات ولعب مع هذا نجيب امتيازات ! كذلك السادس اهم شي أنك تسوي العليك وتحضر يومي ومن تخلص التحضير وين ما تروح روح اوكي ؟.

رابعاً : مستواك بالمراحل السابقة يحدد مستواك بالسادس !
والله هاي الإشاعة ما تطب بعقل عاقل ابد ! 
إذا انت بغير مراحل مو كلش هذا لانك ماتدرس زين لكن لو تدرس المعادلة تنقلب ويظهر مستواك .

خامساً : درجاتك بالشهريات ونصف السنة هي درجاتك بالوزاري ما تتغير !
لو نجي نقيسها بالمنطق راح نعرف أنه هاي الإشاعة كلش غلط .. لأنه بالوزاري راح ينطونك فترة تراجع بيها موادك تضبطهم أكثر تتعمق بيهم أكثر تجهز نفسك للامتحان خلال هاي الفترة ، اما نصف السنة والشهريات صعبة على الطالب لان عندو دوام وأيضا تراكمات وماعندو وقت يضبط زين او يفرزن المادة فيدخل للامتحان مو دارس زين فشي طبيعي درجاتو ما تكون كلش ، بالإضافة أنه يمتحن باسئلة اصعب من الوزاري اغلب المرات لأن الأساتذة ما شاء يحبون يعرضون عضلاتهم على الطلاب فالطالب تنزل درجتو ، فطبيعي تكون اقل من المستوى . اذا مو مقياس لمستوى الطالب بالوزاري .

سادساً : حتى لو تتعب وتكون شاطر وذكي وتضبط وتجاوب بالامتحان راح يظلمونك بالتصحيح !
راح اختصر ردي ( هذا تبرير لفشل بعض الطلاب أنه ظلموني بالتصحيح فيخلي الصوج بالمصحح وأنه ظلموا ) لكن والله كلها كلاوات الحقيقة هي انهم هم ما جاوبوا .

سابعاً : لازم تدرس بملازم أساتذة مشهورين حتى تفهم المادة !
هههههههههههه اضحچني والله اكو أساتذة عمالقة وملازمهم بداعة لكن مو معروفين فمو شرط تاخذ الملزمة ع الشهرة مال استاذ الصح انك تاخذها على سمعتها نفسها هي الملزمة .

ثامناً: الفصل الفلاني صعب او المادة الفلانية صعبة وماتنضبط وووووو ... الخ !

مثل ما ذكرت اول نقطة انك بس ينضحك عليك انه فلان مادة صعبة وتصدك ففعلا حتكون صعبة .. لكن حقيقةً اي مادة تدرسها صح حتكون سهلة عندك فتعتمد عليك وما الا خصوصي او دورات حتى تفهم ، عندك اليوتيوب والناس ما تقصر .

تاسعاً : لازم على الاقل مراجعتين حتى تطلع معدل وتضبط !
چا الي قبل چانت عطلتهم كلها ٤٠ يوم حتى مراجعة وحده ما يخلص شلون چاب معدل ! 
فلا تصدگون هذولا ناس تحب تحبط المعنويات فقط . اخطر من كورونا واللهي .

عاشراً : شلفايدة تدرس الكتاب وتتعب بالمادة وتسهر بالنهاية تجي الأسئلة خارجية !
عجل هاي الاسئلة الوزارية مال وزارة جاية من المريخ ؟ اكعد افتحها وشوف من الكتاب لو من كوكب المشتري .

✍ : سالم ال منصور

0/Post a Comment/Comments

أحدث أقدم