كيف اختار ملزمتي وأهمية الدفتر #8

كيف اختار ملزمتي ؟



قبل لا ابدي احجي التفاصيل احب اگول أنه الطالب الي يريد ياخذ ملزمة لازم ياخذها ويثبت عليها وما يغيرها ، لان تغيير الملازم يسبب الباك للطالب ولدماغ الطالب لازم انت من تاخذ ملزمة تثبت عليها وما تغيرها . هواية طلاب غلطوا هذا الغلط وأنهم كل شهر يبدلون ملزمة شكل الا تشابكت عليهم المعلومات والطرق لان كل ملزمة أسلوبها مختلف ، فضروري تثبت على مصدر واحد لانه حتتعود علي وتدرس بي وبالامتحان راح يسهل عليك انك تتذكر المعلومات لأن دماغك حيكون حافظ شكل الملزمة ومكان الجواب والسؤال ويسهل عليك التذكر . اما اذا انت چنت كل فترة تغير ملزمة فهذا الشي يصعب الوضع عليك ويخليك تتخربط بالدرس . تمام ؟ ومن تختار ملزمة لا تختارها على اساس شهرة المدرس لأن هواية ملازم صح صاحبها مشهور لكن ملازمو مو بالمستوى فمن تختار ملزمة أسأل ناس مجربينها ودارسين عليها وهم ينصحونك بيها لان نصيحة المجرب ذهبية. 

فأنت ضروري انك من تاخذ ملزمة تثبت عليها وتاخذها مجربة مو على شهرة الاستاذ تمام ؟

جماعة الخصوصي شي طبيعي أنك لازم تعتمد على ملزمة استاذك ابو الخصوصي لان هو يشرحلك عليها ، مو انت داخل خصوصي وتروح تجيب ملزمة غير أستاذ هذا غلط 🔪 
خلي الملزمة الي بيدك تناسب اسلوبك مدرسك .

جماعة اليوتيوب : هي الافضل انك تاخذ ملزمة الأستاذ الي تتابعو باليوتيوب اوكي ؟ مثل ما حجينا حتى يتطابق اسلوب التدريس مع ملزمتك . لكن أنا برأيي الافضل انك انت تسوي ملزمة بيدك اذا انت تتابع اليوتيوب، يعني تسويلك دفتر خاص بالمادة بمثابة ملزمة تكتب وتحل مع الاستاذ هذا اضبط واقوم طريقة . فيكون كأنها ملزمة انت مسويها بيدك فبهيج حالة كلش تسيطر على المادة لأنك حتحل وتتابع مع الأستاذ وتكتب ملاحظات وتفاصيل تخليك تضبط المادة .

إذا انت طالب لا تتابع يوتيوب ولا خصوصي عندك ، يعني معتمد على مدرستك فهنا الأفضل انك تاخذ ملازم مفصلة . شنو ملازم مفصلة ؟ الملازم المفصلة هي الملازم الي توضحلك كل خطوة شلون صارت وليش ؟ صراحة هي ملازم فعلاً بداعة بحيث تعرف هاي ليش هيج صارت وليش كذا صارت وما تخليك تحير وتفكر .
فهاي الملازم كلش تفيدكم . ب إعتبار انت ماعندك خصوصي او يوتيوب يوضحلك لكن هي الملزمة توضحلك نفسها.

طبعاً الدفتر مهم كلش كلش اهم من الملازم والكتاب تعرف ليش ؟ 
لانك انت الي كتبتو وصممتو وجهزتو بمثابة ملزمة انت مسويها وضروري اي طالب يريد يتفوق بالسادس أنه يسويلو دفتر لكل مادة علمية ( رياضيات , فيزياء , كيمياء ) حتى يضبط مسائل وقوانين هاي المادة ، اتفقنا ؟

تدري ليش الدفتر مهم ؟ لان انت بيدك راح تكتبو وانت بيدك حتكتب طرق الحل وكل خطوة ليش صارت وليش هاي الخطوة هيج نحلت مع ملاحظات انت تكتبها عن كل موضوع وتبقى مدونه عندك حتى من تجي تدرس المادة قبل الامتحان فقط تشوف الدفتر راح تذكر الموضوع وتفهم لان انت مدون الملاحظات كلهم ومراح يكون عندك شي مبهم ، ويكون دفترك هو المرجع .

0/Post a Comment/Comments

أحدث أقدم